កុំមើលរំលង! ទទួលទានមើមទាំង ៥ នេះ ល្អតាំងពីក្បាលរហូតដល់ចុងជើង
ការថែទាំសុខភាព មិនចាំបាច់មានភាពស្មុគស្មាញ ឬថ្លៃនោះទេ។ ដោយគ្រាន់តែចាប់ផ្តើមជាមួយនឹងការផ្លាស់ប្តូរតូចៗដូចជាការបន្ថែមមើម ៥ ប្រភេទខាងក្រោមនេះទៅក្នុងរបបអាហាររបស់អ្នក នឹងអាចបង្កើនគុណភាពជីវិតរបស់អ្នកបានយ៉ាងសំខាន់ ជួយការពាររាងកាយរបស់អ្នកពីក្បាលដល់ចុងជើង។
១) ខ្ទឹមស៖ ខ្ទឹមសមានផ្ទុកសារធាតុ Allicin ដែលជាសមាសធាតុមានអត្ថប្រយោជន៍ជាច្រើនចំពោះសុខភាព ជាពិសេសសមត្ថភាពកាត់បន្ថយកូឡេស្តេរ៉ុល និងសម្ពាធឈាម ដោយហេតុនេះវាជួយការពារប្រព័ន្ធសរសៃឈាមបេះដូង។ ខ្ទឹមក៏មានលក្ខណៈសម្បត្តិប្រឆាំងនឹងបាក់តេរី និងប្រឆាំងការរលាក ជួយរាងកាយប្រឆាំងនឹងការឆ្លងមេរោគ។ ជារៀងរាល់ថ្ងៃ អ្នកត្រូវប្រើខ្ទឹមសស្រស់ ១-២ កំពឹស ក្នុងការចម្អិនអាហារ ដើម្បីបង្កើនសុខភាពទូទៅរបស់អ្នក។
២) ការ៉ុត៖ ការ៉ុតត្រូវបានគេដឹងថាជាប្រភពដ៏សម្បូរបែបនៃសារធាតុ Beta-carotene ដែលត្រូវបានបំប្លែងទៅជាវីតាមីន A ក្នុងរាងកាយ ជួយការពារការមើលឃើញ និងការពារជំងឺភ្នែកដូចជា ជំងឺភ្នែកឡើងបាយជាដើម។ លើសពីនេះ ការ៉ុតក៏មានផ្ទុកសារជាតិ lutein ដែលជាសារធាតុប្រឆាំងអុកស៊ីតកម្មដែលជួយកែលម្អសុខភាពភ្នែក។ មិនត្រឹមតែល្អសម្រាប់ភ្នែកប៉ុណ្ណោះទេ ការ៉ុតក៏ជាអាហារដ៏ល្អសម្រាប់ជំនួយស្បែកផងដែរ ដោយសារសមត្ថភាពរបស់វាក្នុងការពន្យឺតភាពចាស់។
៣) ដំឡូងជ្វា៖ ដំឡូងជ្វាសម្បូរទៅដោយសារធាតុ Beta-carotene ដែលនៅពេលបំប្លែងទៅជាវីតាមីន A ក្នុងរាងកាយ មិនត្រឹមតែល្អសម្រាប់ភ្នែកប៉ុណ្ណោះទេ ថែមទាំងជួយឱ្យស្បែករលោង និងមានសុខភាពល្អទៀតផង។ វីតាមីន A នៅក្នុងដំឡូងជ្វាមានសមត្ថភាពបង្កើនការផលិតកូឡាជែន កាត់បន្ថយភាពជ្រីវជ្រួញ និងការពារស្បែកពីកាំរស្មី UV ដែលបង្កគ្រោះថ្នាក់។ ជាពិសេស ដំឡូងជ្វាពណ៌ស្វាយមានផ្ទុកសារធាតុ Anthocyanins ដែលជាសារធាតុប្រឆាំងអុកស៊ីតកម្មដ៏មានឥទ្ធិពលដែលជួយឱ្យស្បែកភ្លឺថ្លា និងកាត់បន្ថយការរលាក។
៤) ល្ពៅ៖ ល្ពៅគឺជាប្រភពសម្បូរជាតិសរសៃ ដែលជួយសម្រួលដល់ការរំលាយអាហារ និងការពារការទល់លាមក។ លើសពីនេះទៀត ល្ពៅសម្បូរទៅដោយប៉ូតាស្យូម និងម៉ាញេស្យូម សារធាតុរ៉ែពីរដែលមានសារៈសំខាន់សម្រាប់តុល្យភាពអេឡិចត្រូលីត ជួយដល់មុខងារសាច់ដុំ និងកាត់បន្ថយហានិភ័យនៃជំងឺបេះដូង។
៥) ឆៃថាវក្រហម៖ ឆៃថាវក្រហមគឺជាប្រភពដ៏អស្ចារ្យនៃជាតិដែក ហ្វូឡាត និងនីត្រាតធម្មជាតិ ដែលជួយសម្រួលដល់ចរន្តឈាម និងជម្រុញមុខងារបេះដូង។ ឆៃថាវក្រហម ក៏ជួយថ្លើមបន្សាបជាតិពុលផងដែរ ដោយសារសមាសធាតុ betaine ។ ទឹក beetroot ឬ beetroot salad មិនត្រឹមតែជួយឱ្យរាងកាយមានសុខភាពល្អប៉ុណ្ណោះទេ ប៉ុន្តែថែមទាំងបង្កើនថាមពលពេញមួយថ្ងៃផងដែរ៕
ព័ត៌មានថ្មីៗ
