ទំនាក់ទំនងមួយចំនួន បើកាន់តែចូលទៅជិត កាន់តែស្នាលស្និទ្ធ រឹតតែមានបញ្ហាទៅវិញ
ការប្រាស្រ័យទាក់ទងរវាងបុគ្គល និងបុគ្គល គឺជាចំណេះដឹងមួយ ចង់ធ្វើវាឱ្យបានល្អ ពិតជាមិនងាយស្រួលនោះទេ។ ពេលដែលនៅឃ្លាតឆ្ងាយគ្នា ទំនាក់ទំនងនឹងប្រែទៅជាសាបរលាប ពេលដែលនៅជិតគ្នាពេក ក្នុងចិត្តអាចនឹងមានសភាពខឹងផងស្រលាញ់ផង។
មិនថាជាគ្រួសារ មិត្តភក្តិ មិត្តរួមថ្នាក់ មិត្តរួមការងារក្តី ពេលដែលត្រូវរ៉ូវគ្នានោះ សឹងតែពាក់អាវមួយជាមួយគ្នាបាន តែពេលដែលឃ្នើសចិត្តទាស់សម្ដីនឹងគ្នាវិញ សឹងតែវ៉ៃឱ្យស្លាប់ក៏មិនរាប់អានគ្នាវិញដែរ។
ឆាកជីវិតប្រៀបដូចជាបន្ទាត់ ចាំបាច់ត្រូវមានក្រិត្យ មនោសញ្ចេតនាក៏បែបនេះដែរ កុំឱ្យហួសព្រំដែន។ ការប្រាស្រ័យទាក់ទងរវាងបុគ្គល និងបុគ្គល ដាច់ខាតត្រូវតែមានកម្រិត ទំនាក់ទំនងល្អយ៉ាងណា មិនអាចនៅជិតគ្នាពេកទេ ពុំដូច្នោះទេ ទីបំផុតក៏ឃ្លាតកាន់តែឆ្ងាយពីគ្នាជាសន្សឹមៗដោយមិនដឹងខ្លួន ហើយរងរបួសបែរជាខ្លួនយើងទៅវិញ។
ឱ្យតែដើរជាមួយអ្នកណាជិតពេក សុទ្ធតែអាចនាំឱ្យរបួស។ ពេលដែលនៅជិតមិត្តភក្តិពេក ចំពោះពាក្យសម្ដីមិនប្រុងប្រយ័ត្ន ចំពោះប្រាក់កាក់ហួសព្រំដែន ចំពោះទង្វើខ្វះការគោរព ពេលយូរៗទៅ មានបញ្ហាកើតឡើង អ្នកណាក៏ដើរចេញដែរ។
រវាងសាច់ញាត្តិ ជួបមុខគ្នារាល់ថ្ងៃ ស៊ើបរឿងក្នុងផ្ទះពីគ្នាទៅវិញទៅមក ចែករំលែកដំណឹងតគ្នា យូរៗទៅក៏ធុញហើយប្រែទៅជាស្អប់ ហើយក៏ត្រូវដាក់គម្លាតរវាងគ្នា។
រវាងក្រុមគ្រួសារ លូកលាន់រឿងច្រើនពេក កូនក៏ធុញ ប្តីប្រពន្ធក៏មានវិវាទ។ ដូច្នេះ ទោះជានៅជាមួយអ្នកណាក៏ដោយ ត្រូវតែរក្សារគន្លាតដែលសមហេតុផល។
ប្រសិនបើធ្វើបានហើយ រវាងដៃគូស្នេហាត្រូវទុកពេលវេលាឱ្យគ្នាទៅវិញទៅមក នោះមនោសញ្ចេតនានឹងល្អូកល្អើន រវាងកូនប្រុសស្រីវិញ មានការប្រាស្រ័យទាក់ទងគ្នាបានល្អ រវាងសាច់ញាត្តិបងប្អូនវិញ មិនត្រូវមានចិត្តមិនគោរព និងមិនប្រុងប្រយ័ត្នចំពោះគ្នានោះ បែបនេះទើបអាចស្រុះស្រួលគ្នាបាន ។
រវាងមិត្តភក្តិ ត្រូវចងចាំថាគ្មានអ្វីត្រូវទាមទារពីគ្នាឡើយ នោះមិត្តភាពនឹងគង់វង្សយូរអង្វែង។ រវាងមនុស្សដែលស្គាល់គ្នាវិញ និយាយពាក្យប៉ុន្មានម៉ាត់ ហើយកុំឱ្យលើសព្រំដែន។
ផ្តល់ផ្លូវមួយសម្រាប់អ្នកដទៃ ផ្តល់ពេលវេលាផ្ទាល់ខ្លួនសម្រាប់ខ្លួនឯង នេះប្រហែលជាគម្លាតដ៏ល្អបំផុត។ គម្លាតដ៏ល្អនេះ តាមពិតទៅ គឺជាការគោរពគ្នាទៅវិញទៅមក ចេះស្តាយស្រណោះគ្នាទៅវិញទៅមក៕
ប្រភព ៖ https://kknews.cc / ប្រែសម្រួល ៖ Mythical Bird
ព័ត៌មានថ្មីៗ
