យកភាពដែល “មិនអាចទៅរួច” ធ្វើឱ្យប្រែទៅជា “អាចទៅរួច”
“ភាពមិនអាចទៅរួច” នេះ នៅក្នុងជីវិតរបស់យើង លេចចេញច្រើនរាប់មិនអស់ មានពេលខ្លះពិតជារឿងដែលគ្មានសមត្ថភាពអាចធ្វើបាន ប៉ុន្តែជាច្រើនលើក បែរជាខ្លួនឯងមិនបានខិតខំប្រឹងប្រែងបណ្តាលឱ្យអាក់ខានទៅវិញ។
ចាប់ពីរឿងដែលមិនអាចធ្វើបាន រហូតក្លាយទៅជារឿងដែលអាចធ្វើបាន តើមានចម្ងាយឆ្ងាយប៉ុនណាទៅ? នេះមិនអាចប្រើតួលេខជាក់ស្តែងមួយមកបង្ហាញបានទេ ប៉ុន្តែ បើអ្នកឧស្សាហ៍ ធ្វើរឿងអ្វីមួយដដែលៗ នោះអ្នកនឹងយល់ពីភាពដ៏អស្ចារ្យនៅក្នុងនោះ ។
លោក Ippei Hara (原 一平) ដែលជាបុគ្គលមានឈ្មោះល្បីមួយរូប បានធ្វើការនៅក្រុមហ៊ុនធានារ៉ាប់រងអាយុជីវិតនៅប្រទេសជប៉ុន។ នៅក្នុងប្រទេសជប៉ុនមានក្រុមហ៊ុនធានារ៉ាបរងចំនួន២០ ហើយអាជីវកម្មប្រភេទដូចគ្នានេះ ច្រើនរាប់មិនអស់ តែកេរ្តិ៍ឈ្មោះល្បីជាងគេគឺជាគាត់ អាចនិយាយបានថា គ្មានអ្នកដែលមិនស្គាល់ និងមិនដឹងពីលោកនោះឡើយ។
លោកត្រូវបានគេស្គាល់ថាជា “ទេវតាលក់” នេះដោយសារតែសមិទ្ធិផលរបស់គាត់ក្នុងការរក្សាបាននូវស្នាដៃខ្ពស់បំផុតរបស់ជាតិនៅក្នុងវិស័យធានារ៉ាប់រងជប៉ុនក្នុងរយៈពេល ១៥ ឆ្នាំជាប់ៗគ្នា។
លោកមិនត្រឹមតែនៅក្នុងរយៈពេល៣ឆ្នាំបានបង្កើតនូវកំណត់ត្រាលក់លេខមួយទូទាំងប្រទេសជប៉ុនទេ ក្រោយពេលគាត់អាយុ៤៣ឆ្នាំ នាមជើងឯករបស់លោកមិនដែលធ្លាប់បានប្តូរម្ចាស់នោះឡើយ ស្របពេលនេះដែរ លោកបានលក់ដាច់អស់រាប់លានដុល្លារក្នុងរយៈពេល ១៧ ឆ្នាំជាប់ៗគ្នា។
នៅឆ្នាំ១៩៦២ លោកត្រូវបានរដ្ឋាភិបាលជប៉ុនផ្តល់រង្វាន់ “មេដាយឥស្សរៈយសថ្នាក់ទី៤” សូម្បីតែនាយករដ្ឋមន្រ្តីជប៉ុន Takeo Fukuda (福田赳夫) ក៏ចូលចិត្តលោកខ្លាំងណាស់ដែរ លោកធ្លាប់ត្រូវបានសរសើរថា “ក្នុងនាមខ្ញុំជានាយករដ្ឋមន្ត្រីម្នាក់ គ្រាន់តែអាចទទួលបាន មេដាយឥស្សរៈយសថ្នាក់ទី៥ ប៉ុណ្ណោះ” ។
នៅឆ្នាំ ១៩៦៤ សមាគមអន្តរជាតិសហរដ្ឋអាមេរិក បានប្រគល់ “ពាន់រង្វាន់បណ្ឌិតសភា” ជូនលោក Ippei Hara (原 一平) នេះគឺជាកិត្តិយសខ្ពស់បំផុតសម្រាប់អ្នកលក់សកល ក្នុងគោលបំណងដើម្បីសរសើរសមិទ្ធិផលរបស់លោកនៅក្នុងអាជីវកម្មលក់ ។
លោក Ippei Hara (原 一平) គឺជា ប្រធាននៃក្រុមហ៊ុនធានារ៉ាប់រង Meiji Yasuda Life Insurance ក៏ជាអ្នកពិគ្រោះយោបល់ខ្ពស់បំផុតនៅក្នុងក្រុមហ៊ុន។ ចំណុចសំខាន់នៅលើខ្លួនរបស់គាត់នោះគឺ ការសើច ការសើចរបស់គាត់ត្រូវបានគេស្គាល់ថា “ការសើចដែលមានតម្លៃរាប់លាន”។
ចុះហេតុអ្វីបានជាលោក Ippei Hara (原 一平) ត្រូវហ្វឹកហាត់ ស្នាមញញឹមដោយក្តីលំបាកទៅវិញ? ព្រោះគាត់យល់ថា ស្នាមញញឹម មានអត្ថប្រយោជន៍ច្រើនក្នុងសកម្មភាពផ្សព្វផ្សាយអាជីវកម្ម ៖
១. ស្នាមញញឹមគឺជាផ្លូវកាត់ដើម្បីបង្ហាញក្តីស្រឡាញ់ចំពោះគ្នាទៅវិញទៅមក។
២. សំណើចគឺលក្ខណៈឆ្លងរាលដាល ស្នាមញញឹមរបស់អ្នកអាចធ្វើឱ្យអ្នកដទៃសើច និងសប្បាយចិត្ត។
៣. គន្លាតរវាងអ្នកទាំងពីរអាចត្រូវបានលុបចោលយ៉ាងងាយស្រួល ហើយធ្វើឱ្យទ្វារចិត្តរបស់គេបើកយ៉ាងទូលាយ។
៤. ស្នាមញញឹមគឺជាជំហានដំបូងក្នុងការបង្កើតទំនាក់ទំនងនៃការជឿទុកចិត្ត វានឹងបង្កើតមិត្តភក្តិនៃដួងវិញ្ញាណ។
៥.ស្នាមញញឹមអាចជម្រុញភាពរីករាយដល់ការងារ និងបង្កើតលទ្ធផលការងារ។
៦. ស្នាមញញឹមអាចបំបាត់នូវអារម្មណ៍តូចចិត្តរបស់ខ្លួន និងប៉ះប៉ូវភាពខ្វះចន្លោះរបស់ខ្លួន។
៧. ប្រសិនបើស្នាមញញឹមគ្រប់ប្រភេទជារបស់អ្នក ហើយស្គាល់ច្បាស់ពីវា អ្នកនឹងអាចមើលឆ្លុះពីដួងចិត្តរបស់ដៃគូម្ខាងទៀត។
៨. ស្នាមញញឹមអាចធ្វើឱ្យសុខភាពប្រសើរឡើង និងបង្កើនសមត្ថភាពសកម្មភាព។
អ្វីដែលលោក Ippei Hara (原 一平) បានមើលឃើញ ស្នាមញញឹមរបស់ទារក គឺមានភាពស្មោះសរ គ្មានពុតត្បុតឡើយ មានការទាក់ទាញបំផុត។ ដោយហេតុនេះហើយ គាត់បន្តហ្វឹកហាត់មិនឈប់ឈរ ពេលដែលដឹងថាមានស្នាមញញឹមប្រហាក់ប្រហែលនឹងទារកហើយ ទើបគាត់ឈប់។
ជំហានដែលគាត់ហ្វឹកហាត់ ដំបូងត្រូវពិនិត្យមើលថាខ្លួនមានស្នាមញញឹមប៉ុន្មានប្រភេទ បន្ទាប់មកកត់ត្រាទុកពីអារម្មណ៍ និងទឹកចិត្តនៃស្នាមញញឹមផ្សេងៗ ចុងក្រោយបានចាប់ផ្តើមហ្វឹកហ្វាត់ ក្រោយពីធ្វើការបូកសុរបរួច បានឱ្យគាត់ដឹងថាមានស្នាមញញឹមលេចឡើងលើក្រដាសចំនួន៣៨ប្រភេទ។
ជាក់ស្តែង វិថីក្នុងការលក់របស់លោក Ippei Hara (原 一平) មិនមែនរលូននោះទេ ដំបូងឡើយ ស្ទើរតែយក “ភាពខ្មៅអួរអាប់” មកពណ៌នា។ លោកបានរំឭកថា “ក្នុងខ្លួនរបស់ខ្ញុំក៏គ្មានគុណសម្បត្តិ និងសមត្ថភាពអ្វីដែលគួរនិយាយដែរ ជីវិតដ្បិតតែបានលេចមុខមាត់គួរឱ្យខ្លាចមកកាន់ខ្ញុំមែន ខ្ញុំនៅតែប្រើស្នាមញញឹមទៅកាន់គេ ពីព្រោះខ្ញុំតែងមានជំនឿដោយមុតមាំថា ផ្ទៃមេឃនៃឆាកជីវិតគង់តែមានថ្ងៃមួយភ្លឺស្រលះ”។
ដើម្បីហាត់សមស្នាមញញឹមដែលសក្តិសមមួយ លោកបានប្រៀបប្រដូចទៅនឹងគ្រប់ស្ថានភាព និងផ្លូវចិត្តរបស់គាត់ លោកនៅពីមុខកញ្ចក់ហឹ្វកហាត់ទឹកមុខម្តងហើយម្តងទៀត រហូតដល់ស្នាមញញឹមរបស់លោកឱ្យអ្នកដទៃមើលឃើញថាបែបធម្មជាតិ ស្នាមញញឹមស្មោះពិតចេញពីចិត្ត។
លោកយល់ថា “ការសើចនេះ ចាំបាច់ចេញពីខ្លួនទាំងស្រុង ទើបអាចបង្កើតជាកម្លាំងចម្លងដ៏ខ្លាំងខ្លា” ដូច្នេះ គាត់បានទៅរកកញ្ចក់ដែលអាចឆ្លុះខ្លួនគាត់បានមួយជំហរខ្លួន ប្រើពេលវេលាទំនេរ ហ្វឹកហាត់ទាំងយប់ទាំងថ្ងៃ។ មានពេលខ្លះនៅតាមផ្លូវ គាត់បានហ្វឹកហាត់ការសើច អ្នកធ្វើដំណើរមានការងឿយឆ្ងល់ យល់ថាគាត់មានជំងឺប្រសៃប្រាសាទ។ ស្ទើរតែ នៅក្នុងសុបិនមិនបានភ្លេចញញឹមទៀតផង តែងតែសើចទាល់តែភ្ញាក់តែម្តង។
ការខិតខំប្រឹងប្រែដោយលំបាកពិតជាមិនបានធ្វើឱ្យមនុស្សខកចិត្តមែន ក្រោយពីឆ្លងកាត់ការហ្វឹកហាត់ដ៏លំបាក តាមរយៈស្នាមញញឹមរបស់គាត់ គឺអាចបង្ហាញចេញនូវប្រតិកម្មអារម្មណ៍ផ្សេងៗគ្នា ក៏អាចប្រើស្នាមញញឹមរបស់គាត់ចម្លងទៅអ្នកដទៃបានដែរ។
មានម្តង លោក Ippei Hara (原 一平) បានទៅជួបភ្ញៀវម្នាក់ បានដឹងថាភ្ញៀវម្នាក់នេះមានចរិតមិនសូវជាចេះនិយាយស្តី ឆាប់ឆេវឆាវ ក្រោយពីបានជួបមុខហើយ ក្នុងការសន្ទនាគ្នា រឹតតែអាចមើលដឹងថាអារម្មណ៍របស់គេឡើងចុះមិននឹងនរឡើយ។
Hara ៖ “សួស្តី ខ្ញុំគឺ Ippei Hara (原 一平) ជាបុគ្គលិកផ្នែកលក់របស់ក្រុមហ៊ុន Meiji Yasuda Life Insurance “។
ភ្ញៀវ ៖ “ អូ! សុំទោស ខ្ញុំមិនចូលចិត្តធានារ៉ាប់រងឡើយ ខ្ញុំស្អប់ធានារ៉ាប់រងតាំងពីដើមមក។”
Hara ៖ “ អាចប្រាប់បានទេ ថាមូលហេតុអ្វី?” ខ្ញុំនិយាយដោយញញឹម។
ភ្ញៀវ ៖ “ ការស្អប់មិនចាំបាច់ត្រូវការហេតុផលទេ!” គាត់ស្រាប់តែបន្លឺសំឡេងឡើង បង្ហាញថាដូចជាធុញទ្រាន់។
Hara ៖ “ ឮមិត្តភក្តិថានៅក្នុងវិស័យនេះលោកធ្វើបានជោគជ័យណាស់ ពិតជាស្ញប់ស្ញែងលោកមែនទែន បើខ្ញុំអាចនៅក្នុងវិស័យរបស់លោកក៏អាចធ្វើបានដូចជាអ្នក នោះពិតជារឿងល្អមួយជាមិនខាន”។
ភ្ញៀវ ៖ “ ខ្ញុំមិនចូលចិត្តអ្នកលក់ធានារ៉ាប់រងរហូតមក តែស្នាមញញឹមរបស់លោកឱ្យខ្ញុំពិបាកបដិសេធក្នុងការជជែកពិភាក្សាជាមួយលោក។ ល្អ! លោកនិយាយពីធានារ៉ាប់រងរបស់លោកទៅមើល។”
តាមរយៈការសន្ទនាគា្ន Ippei Hara (原 一平) បានដឹងថា ភ្ញៀវមិនបានស្អប់ធានារ៉ាប់រងទេ តែគាត់មិនពេញចិត្តអ្នកដែលលក់ធានារ៉ាប់រង។ ក្រោយពីដឹងពីបញ្ហានេះហើយ កិច្ចសន្ទនាគាត់បន្តមកទៀតគឺនៅតែរក្សាស្នាមញញឹមដដែល ឱ្យភ្ញៀវមានអារម្មណ៍ថាដូចជាបានស្ថិតនៅក្នុងបរិយាកាលដ៏ល្អមួយ។ ចុងក្រោយ ភ្ញៀវក៏បានចុះហត្ថលេខានៅលើបញ្ជីដោយក្តីរីករាយ បន្ទាប់មកក៏បានចាប់ដៃ ពោលពាក្យលាគ្នាជាមួយ Ippei Hara (原 一平)៕
អត្ថបទ ៖ Mythical Bird / Knongsrok
ព័ត៌មានថ្មីៗ
